Demantohen mediat në Serbi lidhur me “një sulm te Ujmani”

16 dhjetor 2022 15:12

Në kuadër të ngjarjeve të fundit, përkatësisht pas arrestimit të ish-pjesëtarit të Policisë së Kosovës, Dejan Pantiq, i cili dyshohet që ka sulmuar zyret e Komisionit Komunal Zgjedhor (KKZ) në veri të Kosovës, u vendosën barrikada në rrugët që shpijnë drejt pikave kufitare në Jarinje dhe Bërnjak. Raportime rreth këtyre ngjarjeve ka pasur edhe nga mediet në Serbi, të cilat kanë spekuluar lidhur me motivet e vendosjes së barrikadave dhe aktivitetet që ndërmerr Policia e Kosovës (PK) në veri. 

Më 11 dhjetor, Kurir.rs ka publikuar lajmin “ANËTARËT ROSU SULMUAN ME MJETE TË Blinduara GAZIVODËN: Larguan flamujt serbë, pushtuan ndërtesën e digës”.

Tutje, në lajm thuhet se “Me tyta [të armëve] dhe automjete të blinduara e kapën rojën i cili ishte duke matur nivelin e ujit atje, e përzunë nga ndërtesa dhe i rrëzuan flamujt serbë që ndodheshin aty. Sipas informacioneve të fundit, ata janë ende në objektin pranë digës së madhe në Gazivodë, të cilën e kanë uzurpuar me dhunë dhe në mënyrë të paligjshme”. Lajmit i është bashkëngjitur edhe një fotografi me liqenin e Ujmanit dhe një polic të njësisë speciale i cili mban armë të gjata.

Image

Megjithatë, ky lajm nuk e mbështet me ndonjë fakt apo argument pretendimin për sulm ndaj rojës së Ujmanit. Edhe PK-ja ka demantuar këtë lajm dhe pretendimet e “disa mediave serbe të cilat i referohen se kinse njësitet speciale të PK-së, te Ujmani kanë ndaluar dhe maltretuar një qytetar/punonjës serb dhe kinse kanë marrë objektet në atë lokacion”.

Image

Më tej, PK-ja ka sqaruar edhe vendodhjen e pjesëtarëve të saj, duke thënë se njësitë e PK-së janë të vendosura në rrugën kryesore që shpie në drejtim të pikës kufitare të Bërnjakut dhe se as është vendosur në ndonjë objekt të caktuar, as ka maltretuar ndonjë person apo punonjës, siç është publikuar në media. Sipas PK-së, vetëm “është legjitimuar një person i cili ka qenë duke kryer inçizime me telefon në atë lokacion, i cili pas legjitimimit ka vazhduar pa asnjë problem”.

Përkundër kërkesës së komunitetit ndërkombëtar për heqjen e barrikadave në veri, ato nuk janë larguar ende. Ndërkaq, Qeveria e Kosovës i ka bërë thirrje KFOR-it, i cili është i mandatuar të garantojë lirinë e lëvizjes, që t’i largojë sa më shpejtë barrikadat.

16 dhjetor 2022
15:12

Disinfo